Өзбекстанның Самарқан қаласында өтіп жатқан рапид пен блиц шахматтан әлем чемпионаты бел ортасына жетті. Әзірге рапидтен чемпиондар анықталып үлгерді, алда блиц бар.

28 желтоқсанда ерлер арасында 13, ал әйелдер араында 11 турға созылған рапидтен жүлдегерлер анықталды. Ерлер арасында Свен Магнус Карлсен 10 ұпай жинап, тағы ешкімге дес берген жоқ. Норвегиялық гроссмейстер былтыр Алматыда қос алтынға қол жеткізген. Алдағы күндері сол блицте жетістігін қайталаудан дәмелі. Магнус – енді рапидтен 5 дүркін, блицтен 6 дүркін әлем чемпионы. Сонымен қатар оның классикалық шахматтан 5 дүркін әлем чемпионы деген атағы тағы бар. Бүгін күміс Владимир Федосеевке (Словения), қола Ю Янгқа (Қытай) бұйырды.

Қазақстан ойыншыларынан ең үздік нәтиже Денис Махневтің еншісінде (8 балл). Одан кейін Әлішер Сүлейменов (7,5) тұр.

Әйелдер арасында Анастасия Боднарук (FIDE) топ жарса, Үндістан шахматшысы Хампи Конеру күміс, Лей Тинцзе (Қытай) қола жүлдеге ие болды. Үш ойыншы да 8,5 ұпайдан жинады. Қосымша көрсеткіш бойынша Анастасия бас жүлдеге қол жеткізді.

«Қазір чемпион атанғаныма сене алмай отырмын. Мұндай нәтиже көрсетем деп ойлаған жоқпын. Шешуші турда Хампи Конеру менен жақсы ойнады. Алайда мен барынша жылдам ойын көрсетуге тырыстым. Рапидті жақсы ойнайтыным рас. Биыл Ресей чемпионатында топ жардым. Енді барынша тынығып, ертеңгі блицке дайындаламын»,-деді Анастасия.

Ұлттық құрама көшбасшысы Бибісара Асаубаева бұл сынды 19-орында аяқтады. Ол бүгін Май Нарва (Эстония), Элина Даниелиян (Армения), соңғы турда Нутакки Приянкамен (Үндістан) тең ойнап, ұпай санын жетеуге жеткізді. Ұлттық құрамадағы жас ойыншының бірі Зарина Нұрғалиева да 7 балл жинап, қосымша көрсеткіш жағынан 18-сатыға көтерілді.

Биылғы чемпионаттың жалпы жүлде қоры – 1 миллион доллар. Оның 700 мыңы ерлер арасындағы ашық бәсекеде, қалған 300 мыңы әйелдер арасындағы турнирдің жүлдегерлеріне үлестіріледі.

Енді 29-30 желтоқсанда блиц шахматтан мықтылар анықталады.

Рапид пен блицтен былтырғы әлем чемпионаты тура осы уақытта Алматы қаласында өтіп, рапидте Динара Сәдуақасова күміс жүлдегер атанса, блицтен соңғы турда Бибісара Асаубаева алтыннан алқа таққан. Ал ерлер арасында екі сында да Магнус Карлсен қарсылас шақ келтірген жоқ. Сондықтан Бибісараның үш дүркін әлем чемпионы атанғанын күтеміз.