«Шахтер» – «Ертіс» – 1:1

Көкше клубын түздегі ойында тізек бүктірген «Шахтер» өз алаңында ұтылмайды деп ойлаймын. Егер осы ойында жеңіліп қалса, жағдайлары одан да нашарлай түсетінін біледі. Сондықтан кеншілер алаңда барын салады.

«Ордабасы» – «Ақжайық» – 2:0

Оралдықтардың ойыны асау «Жайықтың» мінезіндей кейде тасып, бірде бәсеңдей түсетіні баршаға мәлім. Әрине, туған жердің командасына бүйрегіміз бұрып тұрады. Дегенмен, азулы «Ордабасы» еш қиындықсыз жеңеді деп ойлаймын.

«Тобыл» – «Астана» – 1:3

Соңғы ойында Оралда жеңіліске ұшыраған қостанайлықтар бұл турда екпінді елордалық қырандарға тап болып отыр. «Қайратпен» ойнағанда «қанның» иісін сезбеген «жыртқыштар» осы жолы «Тобылды» тобықтан қағады.

«Атырау» – «Қайрат» – 0:1

«Ұпайларды қайтару» операциясын бастаған атыраулықтарға осы ойында сәл ғана сәттіліктің жетіспеуі мүмкін. Кахабер Цхададзе жаттықтыратын «Қайрат» батырлар мекенінен үш ұпаймен оралады.

«Қайсар» – «Ақтөбе» – 2:0

Күйі кеткен «Ақтөбенің» – күйінетін күні. Қайсар мінезділер қарсыласын «қансыратады». Қызылорда клубы сегіз тур болды, жеңіске жете алмай жүр. Бұл турда аянбайды.  

«Тараз» – «Оқжетпес» – 1:1

Деңгейлері бірдей командалар арасындағы ойында жеңімпаз анықталмайды деп сенемін. Аз гол соғып, көп доп жіберетін қос команда тең ойынға қанағат тұтатын сияқты.

Көшбасшылар өзгерген жоқ

Өткен, Х турдың ойындарына Massaget.kz порталының спорт шолушысы Өмірбек Сансызбай болжам жасаған болатын. Төмендегі кестеден әріптесіміздің болжамы мен алты матчтың нақты нәтижелерін салыстарып көре аласыздар.

Өмірбек Сансызбайдың Х турға берген болжамының қорытындысы: