– Ертең Қазақстан футболының жакнүйерлері үшін үлкен мейрам болайын деп тұр. Жасыл алаңға ең мықты екі клуб шығады. Шынын айтқанда, «Астанаға» қарағанда бізге қиынырақ болады. Өйткені, елордалықтар Еуропа лигасындағы ойындары арқылы маусымға кірісіп кеткен. Олар қазір нағыз бабында. Ал біз өзіміздің соңғы ойынымызды өткен жылдың 5 қарашасында өткізді. Содан бері әлі ресми кездесуге қатысқан жоқпыз. Соған қарамастан, ертеңгі ойында барымызды саламыз. Суперкубокты Алматыға алып кетеміз деп үміттенемін. Әлбетте, «Астана» да оңайлықпен жеңісті бере қоймас. Оның үстіне, қазір олардың бас бапкері ауысып, футболшылары Стойловсыз да ойнай алатынын көрсету үшін барын салады деп ойлаймын. Сондықтан, ертеңгі ойын екі жақ үшін де жанкешті болмақ.
– Өз футболшыларыңыздың физикалық дайындығы жайлы не айта аласыз?
– Маусымды бастау – әрдайым қиын. Бұл бізге ғана емес, барлық командаға да қатысты. «Астана» маусымға бізге дейін кірісіп кетті. Оларға оңай болады. Әрине, біз де маусым алдындағы ойындарды өткіздік. Дегенмен, спаррингтік кездесулерді ресми матчтарғмен салыстыруға мүлдем болмайды.
– Ертеңгі ойынға «Қайрат» футболшылары қандай мотивациямен шығады?
– Біздің басты мотивациямыз – Қазақстан футболының ең үздік командасының намысын қорғайтынымыз. «Қайраттың» жейдесімен алаңға шыққан сайын футболшыларымыз үлен жауапкершілікті сезінеді. Өйткені, біздің командамыз еліміздің әр қаласында бар. Ал ертең бізді кубок күтіп тұр. Бұдан артық қандай мотивация керек?!
– Осыдан екі күн бұрын «Астананың» бас бапкері ауысты. Қалай ойлайсыз, елордалықтар қазір әлсіреді ме, әлде бұрынғыдай мықты ма?
– Мұндайды біздің елде «инкогнито» дейді. Яғни, жаңа бас бапкер келгенде команданың қалай өзгеретінін білмейсің. «Астананың» бұған дейінгі бас бапкері команда үшін көп нәрсе жасады. Қазір ол ұлттық құрамада. Мен оған тек сәттілік тілеймін! Ал қазіргі бас бапкері бұрын ассистент болған. Яғни, команданың жағдайын жақсы біледі. Сондықтан, ойындарында аса қатты өзгеріс болмай, сол бағытта жұмыстарын жалғастырады деп ойлаймын.
– Сіздің командаңыз дайындықтарын табиғи шөпті стадиондарда өткізді. «Астанамен» жасанды алаңда ойнауға қаншалықты дайынсыздар?
– «Астана» жасанды алаңда бұрыннан ойнайды. Дегенмен, бұдан сылтау іздеуге болмайды. Өткен жылы осы алаңда жеңіске жеткенбіз. Сондықтан, алаңға жылдам үйренісіп, өз ойынымызды тез табуға тырысуымыз керек.
– Қазақстанда жүргеніңізге біраз уақыт болып қалды. Қазақша қандай сөздер үйрендіңіз?
– По русский? Я хочу говорить по русский. Это очень трудно. Я понимаю, но говорить трудно. Я хочу учить по русский, - деп бағанадан бері испан тілінде сөйлеп отырған Карлос Алос таза орысша «сайрай» кетті.
– Жоқ, қазақша сөздерді сұрап тұрмыз. Мысалға, рахмет...
– (Қысылып) Ия, «рахметті» білемін.
– Команда Жерар Гоусыз ойнай алатындай дәрежеге жету үшін қанша уақыт керек?
– Команданың ойыны өткен маусымдағыдай болады деп ойлаймын. «Астана» да Жуниор Кабананганы жоғалтқан, біз де Жерар Гоуды жібердік. Теңбе тең. Жалпы, шабуылшыларға жаңа команданың ойынына үйрену қиындау. Уго командаға жылдам үйренісіп, жігіттер де оны тез қабылдайды деген үміттемін. Одан бөлек, бізде алғы шепте Чума Анене бар. Әзірге физикалық дайындығы кемшіндеу. Десек те, біз үшін маңызды ойыншылардың бірі.
– Ал Андрей Аршавиннің қазіргі дайындығы қалай?
– Ол туралы көп сөздің де қажеті жоқ. Оның талантты, шебер ойыншы екенін бәріңіз жақсы білесіздер. Ол әр матчқа жүз пайыз дайындықпен шығады.
– Ертеңгі ойында алаңға кімдердің шығатындықтарын шештіңіз бе?
– Иә, кімді алаңға шығаратынымды, негізгі құрамның футболшыларын анықтап қойдым. Бірақ, сіздерге айтпаймын. Ойын соңында сұраңыздар.