– Сөз жоқ, «Астана» бұл кездесуде бізден әлдеқайда мықты болды. Дегенмен, менің үмітім ақталды. «Астана Аренада» жақсы ойнадық. «Спартактың» ойыны сіздерге де ұнады деп үміттенемін, – деп бастады латвиялықтардың бас бапкері. – Егер өз алаңымызда ұтылмағанда келесі кезеңге шығатын мүмкіндігіміз зор болатын еді. Енді «Астананың» «Польшаның Легиясына» қарсы не істей алатынын көреміз. Әлбетте, амбицияларыңыз өте зор. Сондықтан, сіздерге сәттілік тілеймін!

– Бүгінгі ойында «Спартак» «Астанаға» қарағанда жақсырақ ойнады. Қарсыласты әбден зерттегеніңіз көрініп тұр. Сіз Станимир Стойловтан асып түскен секілдісіз...

– Әу баста жеребе бойынша бізге «Астана» түскенде қатты қуанғанмын. Таңсық ел, амбициясы зор таңсық команда... Өзіміздің нағыз әлеуетімізді тексеретін шақ туғанына қуандым. Бірінші ойынның өз алаңымызда өтетіні де жақсы болды деп ойладым. Өйткені, қарсыласпен алдымен өз жеріңде қабылдап, өзіңе деген сенімділігіңді күшейтіп алған дұрыс. Бірақ, Юрмалада ойынымыз жүрмеді. Бүгінгі ойынның алдында «Астананың» артық-кем тұстарын әбден зерттегенім рас. Бірақ келесі кезеңге өте алмаған соң оның бәрі –бес тиын.

– Бүгінгі тең есепті «Спартак» үшін, жалпы Латвия футболы үшін тарихи күн деп айтуға келе ме?

– Иә, дөп түстіңіз. Бұл біз үшін тарихи күн болды. «Астанамен» тең ойнау – үлкен мәртебе.

– «Легиямен» болатын кездесулерде «Астананың» келесі кезеңге шығатын мүмкіндігі қандай деп ойлайсыз?

– Мен 30 пайыз берер едім. «Легия» – мықты.

– Сіз Польша футболын жақсы білесіз. «Легияға» қарсы ойындарда бізге неден қауіптену қажет?

– Польшада ұлттық чемпионат енді басталды. Бірінші турда олар Екінші лигадан келген команданы 2:0 есебімен жеңді. Дегенмен, ойындарында шикіліктің бары көрініп тұрды. Маусымға әлі кіре алған жоқ. Бұл команданы негізі адам түсініп болмайды. Кейде маусымды мықты бастап кетеді, кейде ұзақ "от алады". Сондықтан «Астанаға» қарсы ойында олардан бәрін де күтуге болады. Естіп жатырмын, «Легия» команда құрамын әлі күшейтуді ойлап жатыр екен. Екі-үш ойыншымен келісімшартқа отырмақ көрінеді. Алайда, бәрі де «Астананың» өзіне байланысты. Алғашқы ойын «Астана Аренада» өтсе, сіздерге алдымен осы жерде өздеріңізге қажетті есепке қол жеткізіп алу қажет.