Биыл Бірінші лигаға Талдықорғанның «Жетісуы» үстемдік құрып отыр. Алматы облысының командасы әлі ұтылып көрген жоқ. Екінші турда Қызылордада тек қазақ футболшыларынан жасақталған «Байқоңыр» командасымен тең түсті (1:1). Қалған ойындарда үй демей, түз демей, қарсыластарын оңды-солды ұтып жүр.

Әрі 10 ойында 26 гол соғып, өз қақпасына екі-ақ доп жіберіп алды. Біреуін Қызылордада Ерболат Рүстемов, ал екіншісін Екібастұзда Қуаныш Бегалин соқты. Бірінші лигадағы қалған командалар мен футболшылар «Жетісудың» қақпасына гол соға алар емес.

Иә, «Жетісу» футбол клубының премьер-лигаға қайта оралатындығына енді күмән келтіре алмаймыз, десек те болады. Екінші жолдамадан «Қызыл-Жар» үмітті. Маусымды жоғары қарқында бастай алмағандарымен, тур өткен сайын Петропавл футболшылары жоғары өрлеп, екінші орынға жайғасты.

Үшінші орында әзірше, премьер-лигаға шығуға құқы жоқ «Қайрат А» ұжымы тұр. Ал кіл мықтылар қатарына көтерілуге талпынатындай жөні бар команда көш соңында жүр. Ол – «Каспий» (Ақтау). Бірақ бұл команда бірінші айналым аяқталысымен бас бапкерін қызметінен босатты.

Атап айтқанда, Алматыда «Қайрат А» командасынан 4:1 есебімен оңбай ұтылып қалған соң, Ақтау клубының бас бапкері Асқар Күшікбаев отставкаға кетті. Ал «Каспийді» әзірше Нұрбол Қошқарбаев жаттықтырып жүр. Жаңа бапкер әлі тағайындалған жоқ.