Батыста 17 жасқа дейінгі қыздар арасындағы 2017 жылғы Еуропа чемпионатының електік додалары басталған. Електік додаларының өзі екі сатыдан тұрады. Алғашқы іріктеу кезеңінде 44 құрама 11 топқа бөлінген. Келесі кезеңге 24 команда ғана шығады.

Алайда бізге келесі кезең туралы ойлаудың өзі артық сияқты. Бойжеткендеріміз алғашқы ойында-ақ оңбай сүрінді. Таратып айтар болсақ, қыздар арасындағы Қазақстан U-17 құрамасы алғашқы іріктеу сатысында 6-топқа түскен еді. Бүгін алғашқы ойынын өткізіп, ұтылып қалды...

Бірден айтайық, 6-топтың ойындары Шотландияда өтіп жатыр. Бүгін Роман Заев жаттықтыратын Қазақстан қыздары Франция аруларымен кездесіп, 0:17 есебімен ойсырай ұтылды. Бірінші таймда 11 гол жіберіп алды. Алғашқы голды өздері соғып алды... Жалпы, бұл ойында Франция бойжеткендері біздің қақпаға 42 соққы бағыттаған екен.

Осы топтағы Хорватия және Шотландия бойжеткендері арасындағы ойын әлі аяқталған жоқ. Осы ретте айта кетейік, Қазақстан U-17 құрамасы Шотландия аруларымен 12 қазан күні, ал хорват қыздарымен 15 қазанда кездеседі.

Қазақстан U-17 – Франция U-17 – 0:17

Голдар: Иванюк, 2-өз қақпасына. Мартен, 4; 41; 44; 78. Маляр, 10; 13; 18; 21; 30; 79. Шотар, 16. Рибейро-де-Карвалью, 17. Баша, 22; 40. Кардья, 63. Филипп, 67.

Қазақстан U-17: Исмаилова, Жақсыбай, Флют, Құрманғазина, Волкова, Әділханова, Багули (Ақшалова, 77), Ақбаева, Иванюк (Низамутдинова, 26), Амангелді (Михайлова, 47), Төлегенова.

Ойынның қысқаша статистикасы:

Соққы: 42 – 3

Тура соққы: 27 – 1

Қиыс кеткені: 11 – 2

Тойтарылғаны: 4 – 0

Қақпа бағанасы: 1 – 0

Бұрыштама соққылар: 8 – 0

Офсайдтар: 3 – 0

Ескерту (сары қағаз): 0 – 0

Ереже бұзу: 6 – 7