Павлодарлықтардың бірінші жаттығу жиыны да Жерорта теңізінің жағалауында өткен. Айдың басында «Ертіс» екі аптадай Түркияда оқу-жаттығу жиынын өткізіп, екі жолдастық кездесу өткізген болатын. Біріншісінде Украинаның «Черноморец» клубын 1:0 есебімен ұтып, екіншісінде ресейлік «Краснодардың» жастарымен тең түскен. Есеп – 1:1.

Бұл жолы да «Ертіс» Белекті таңдап отыр. Жалпы, Қазақстан клубтарының жаттығу өткізетін басты ордасы осы Белек қой. Төрт жолдастық кездесу өткізбек екен. Алайда, әзірге бір ғана спарринг-қарсыласы белгілі. Қаңтардың 31-і күні Болгарияның «Лудогорец» клубымен кездеседі. Айта кетейік, бұл клубты «Ертістің» экс-бас бапкері Димитар Димитров жаттықтырады.

Жалпы, Жерард Нус өзіне қажет футболшылармен бірден келісімшартқа отыратын жаттықтырушылардың санатынан екен. Бірінші жиыннан кейін-ақ нигериялық Гболахан Салами, испаниялық Адриан Гомес, румын Дору Попадюк сынды легионерлермен келісімшартқа отырды. «Ертіске» енді ғана қосылған Рахымжан Розыбакиев, Кирилл Шестаков, Мақсат Әмірханов сынды қазақстандықтар да бар. Енді екінші оқу-жаттығу жиынының қорытындысы бойынша тағы неше ойыншы павлодарлықтардың сапын толықтырар екен.

«Ертіс» футбол клубының екінші оқу-жаттығу жиынындағы құрамы:

Қақпашылар: Серікбол Қапанов, Никита Калмыков, Давид Лория.

Қорғаушылар: Адриан Аврамия (Румыния), Берік Айтбаев, Мақсат Әмірханов, Евгений Горячий, Руслан Есімов, Александр Кислицын, Рахымжан Розыбакиев, Милош Стаменкович (Сербия), Дмитртий Шмидт.

Жартылай қорғаушылар: Әлібек Аяғанов, Владимир Воменко, Илья Калинин, Сергей Кисляк (Беларусь), Дору Попадюк (Румыния), Артем Попов, Мадияр Рамазанов, Карлуш Фонсека (Португалия), Павел Шабалин, Кирилл Шестаков, Адриан Гомес (Испания).

Шабуылшылар: Тимур Байжанов, Мидат Галбаев, Гболахан Салами (Нигерия), Арман Смаилов.