Отандық kazfootball.kz басылымы «Бауыржан Жолшиевтің қаңтар айының басында “Ордабасы” клубымен бірінші оқу-жаттығу жиынына барып, сынақтан өтеді» деп жазды. Бұл ақпаратты басқа басылымдар бірден қағып әкетті.

Естеріңізге сала кетейік, Бауыржан Жолшиев 2015 жылы 9 желтоқсан күні «Астана» клубының сапында Чемпиондар лигасының топтық кезеңі аясындағы соңғы матчта алаңға шыққан болатын. Түзде «Галатасарай» клубымен өткен ойынның 1:1 есебімен аяқталғаны да естеріңізден шыға қоймаған шығар.

Содан бері Бауыржан Жолшиев ресми түрде ешқандай ойын өткізген жоқ. Былтыр Қазақстан премьер-лигасындағы кейбір клубтар талантты футболшыға қызығушылық танытқандай да еді. Солардың бірі дәл осы «Ордабасы» болатын.

Ал биыл, жыл басында (дәлірек айтқанда, ақпан айында) Бауыржан Жолшиев Түркияға барып, «Ақтөбе» клубының оқу-жаттығу жиынына қатысқан. Бірақ беймәлім себептермен бұл команданың да жейдесін кимеді... 27-ден асқан дарынды футболшы осылай өз командасын әлі таппай жүр...