Қазақстан футболының тарихында тұңғыш рет Ел кубогының финалы Ақтөбе қаласында өтетін болып шешілді. Айта кетейік, бұған дейін Қазақстан кубогы 25 рет сарапқа салынған болса, соның 14-інің финалын Алматы қаласының Орталық стадионы қабылдаған. Астанада сегіз финал өткен. Оның екеуін Қажымұқан атындағы Орталық стадион қабылдап, қалған алтауы «Астана-Аренада» ұйымдастырылған. Тараз қаласында екі финал өтіп, бір рет ел кубогы Шымкентте сарапқа салынған. Ал биыл Қазақстан кубогының финалы 12 800 көрерменді сыйғыза алатын Ақтөбенің Қобыланды батыр атындағы стадионында ұйымдастырылмақ. Стадион 1975 жылдың тамыз айында ашылып, тек футболға ғана арналып салынған. Былтыр мұнда Қазақстан жастар құрамасы «Еуро-2017» іріктеу додасының аясында Норвегия және Англия жастарын қабылдады.
Дегенмен, Ақтөбе қаласы финалды қабылдауға мүмкіндігі болмаған жағдайда Кәсіпқой футбол лигасы бұл маңызды матчты басқа қалаға ауыстырып жіберуге құқылы. Әзірге финалдың өтетін уақыты нақты белгіленген жоқ.
Естеріңізге сала кетейік, Қазақстан кубогын 7 рет Алматының «Қайраты» жеңіп алса, елорданың «Астана-1964» пен «Астана» командалары үш-үштен иеленген. Сондай-ақ, «Ертіс», «Тараз», «Шахтер», «Ақтөбе», «Тобыл», «Восток», «Ордабасы», «Қайсар», «Алма-Ата», «Атырау», «Спартак», «Достық» (Алматы) командаларына да кубок бір-бірден бұйырған.
| Қазақстан кубогының финалдары | ||||
| Маусым | Дата | Қала | Көрермен | Финалистер |
| 1992 ж. | 08.08.92 | Алматы | 1000 | Қайрат (Алматы) – Фосфор (Тараз) 5:1 |
| 1993 ж. | 08.11.93 | Алматы | 1000 | Достық (Алматы) – Тараз 4:2 |
| 1994 ж. | 07.11.94 | Алматы | 1000 | Восток (Өскемен) – Актюбинец 1:0 |
| 1995 ж. | 07.11.95 | Алматы | 1000 | Елімай (Семей) – Скиф-Ордабасы 1:0 |
| 1996/97 ж. | 26.04.97 | Алматы | 2500 | Қайрат – Восток 2:0 |
| 1997/98 ж. | 10.06.98 | Алматы | 3000 | Ертіс (Павлодар) – Қайсар (Қызылорда) 2:1 |
| 1998/99 ж. | 16.07.99 | Алматы | 2500 | Қайсар – Восток 1:1, 2:0-пен. |
| 1999/00 ж. | 06.07.00 | Астана | 7500 | Қайрат – Ақсесс-Голденгрейн (Петропавл) 5:0 |
| 2000/01 ж. | 17.06.01 | Астана | 10000 | Жеңіс (Астана) – Ертіс 1:1, 5:4-пен |
| 2001 ж. | 17.11.01 | Алматы | 10000 | Қайрат – Жеңіс 3:1 |
| 2002 ж. | 17.11.02 | Алматы | 6000 | Жеңіс – Ертіс 1:0 |
| 2003 ж. | 11.11.03 | Алматы | 8000 | Қайрат – Тобыл (Қостанай) 3:1 |
| 2004 ж. | 11.11.04 | Тараз | 12500 | Тараз – Қайрат 1:0 |
| 2005 ж. | 11.11.05 | Шымкент | 8000 | Жеңіс – Қайрат 2:1 |
| 2006 ж. | 08.11.06 | Алматы | 4700 | Алма-Ата – Астана 3:1 |
| 2007 ж. | 29.11.07 | Тараз | 12000 | Тобыл – Ордабасы 3:0 |
| 2008 ж. | 16.11.08 | Алматы | 7000 | Ақтөбе – Алма-Ата3:1 |
| 2009 ж. | 15.11.09 | Астана | 20000 | Атырау – Шахтер 1:0 |
| 2010 ж. | 14.11.10 | Астана | 9000 | Локомотив (Астана) – Шахтер (Қарағанды) 1:0 |
| 2011 ж. | 13.11.11 | Алматы | 8500 | Ордабасы – Тобыл 1:0 |
| 2012 ж. | 11.11.12 | Астана | 11500 | Астана – Ертіс 2:0 |
| 2013 ж. | 10.11.13 | Астана | 24500 | Шахтер – Тараз 1:0 |
| 2014 ж. | 22.11.14 | Астана | 8000 | Қайрат – Ақтөбе 4:1 |
| 2015 ж. | 21.11.15 | Астана | 10500 | Қайрат – Астана 2:1 |
| 2016 ж. | 19.11.16 | Алматы | 5500 | Астана – Қайрат 1:0 |