Елімізде бұрын-соңды өтпеген қызық турнирдің куәсі болмақпыз. Мұрат Тілешев, Андрей Карпович, Игорь Авдеев бастаған Қазақстан құрамасынан бөлек, елордамызға Италия, Германия, Португалия, Ресей және Әлем құрамасы қатыспақ. Бүгін «Экспо» аумағындағы амфитеатрда жұлдыздар халық алдына шығып, жанкүйерлерге қолтаңба берді.

Кеш жүргізушілері әр құраманы көпшілікке жеке-жеке таныстырып, кейіпкер жұлдыз ортаға шыққан сайын үлкен экраннан олардың суреттері ойнатылып жатты. Оларға қызықты сұрақтар қойылып, тартымды жауаптар алынды.

– Қазақстанға келгеніме қуаныштымын! Осы турнирге шақырғанда қуана келісім бердім. Ертең өте қызықты ойындар басталғалы отыр. Көрермендер көп болады деп үміттенемін. Осы додада екі Карп бар. Турнир Қазақстанда өтіп жатқандықтан сіздердің Карптарыңыз қожайын, - деді Ресей құрамасын бастап келген Валерий Карпин.

Тағы бір айта кетерлігі, жұлдыздарды ортаға Астана футбол федерациясы Балалар футбол орталығының жеткіншектері алып шықты. БФО тәрбиеленушілері ертеңгі турнирде де жұлдыздардың жетегінде кумирлерімен бірге алаңға шықпақ.

Сонымен, екі күн елордамызда үлкен футбол. Билеттерді стадион кассаларынан немесе ғаламтордан сатып алуға болады. Бағасы 2000 теңге. Сондай-ақ, бұл билеттермен кез келген күні кешқұрым уақытта «Экспо» павильондарын аралап шыға аласыз.

EXPO-2017 CUP ойындар кестесі

5 тамыз.  «Астана Арена» стадионы, топтық кезең 
12:00 – 12:45. Қазахстан – Германия (А тобы) 
13:00 – 13:45. Италия – Ресей (В тобы) 
14:00 – 14:30. Салтанатты ашылу шарасы 
14:45 – 15:30. Әлем құрамасы – Қазақстан (А тобы) 
15:45 – 16:30. Португалия – Италия (В тобы) 
16:45 – 17:30. Германия – Әлем құрамасы (А тобы) 
17:45 – 18:30. Ресей – Португалия (В тобы)

6 тамыз. «Астана Арена» стадионы, финалдық ойындар 
13:30 – 14:15. Бесінші орын үшін (3А – 3В) 
14:30 – 15:15. Үшінші орын үшін (2А – 2В) 
15:30 – 16:15. Финал (1А – 1В) 
16:30 – 17:15. Марапаттау рәсімі.