– Өте қиын ойын болады деп күтемін. Олар да соңғы жылдары еурокубоктық ойындарда жақсы ойнап жүр. Тәжірибелері бар. Біз де барымызды саламыз. Мұның алдында Чемпиондар лигасының үшінші іріктеу кезеңінің аясында «Селтикпен» ойнағанбыз. Сол кездегі бірінші матчымыз осы маусымдағы ең мықты ойынымыз болды. Ертең белорустарға қарсы дәл осылай ойнасақ, онда біз сөзсіз БАТЭ-ні өтеміз, - деп бастады Стойлов.
– Константин Энгель ертеңгі ойынға қатыса ала ма?
– Неге екенін білмеймін, бірақ оның құжаттарын рәсімдеп үлгермедік. Ол әлі клуб ойыншысы ретінде Еуропа лигасына тіркелген жоқ.
– «Астананың» екі қорғаушысы дисквалификацияға ұшырап, ертеңгі ойынға қатыса алмайтыны белгілі болды. Қорғаушылар мәселесін қалай шешіп жатырсыз?
– Өте қиын жағдай. Дмитрий Шомко мен Игорь Шитовтан бөлек, Константин Энгель де ертең алаңға шықпайды. Сондықтан, дәл қазір командада бар болғаны төрт-ақ қорғаушы қалды. Сол төртеуімен бірнәрсе ойластырармын.
– Сізді бас бапкерлікке Мәскеудің «Локомотиві» шақырып жатыр дейді. «Астананы» тастап кетпекшісіз бе?
– Маған бұл жайлы ешкім хабарласқан жоқ. Бұл жаңалықтан хабарсызбын. Шынын айтқанда, «Астананы» енді аяқтан тік тұрғызып келе жатқанда, тастап кеткім келмейді. Өзімнің осында қалғым келеді.
– Клуб басшылығы сіздің алдыңызға ерекше талап қойды деген сыбыс бар. Яғни, егер БАТЭ-ні өтер болсаңыздар, «Астанада» қаласыз. Ұтылсаңыз, командамен қоштасасыз. Бұл сыбысты растай аласыз ба?
– Клуб басшылығы тарапынан ешкім маған бұл жайлы ештеңе деген жоқ. Сізден бірінші рет естіп тұрмын. Егер шынымен де солай болса, олардың менің орныма тапқан өз адамы болса, онда мен бәріне дайынмын. Қажет болса, «Астанадан» кетуге әзірмін.
– БАТЭ футбол клубы «Астананың» еурокубоктағы бұрынғы қарсыластарының ішінде қайсысына ұқсайды? Кіммен деңгейлес?
– Борисовтіктердің бұрынғы ойындарын көрдім. Қорғаныста сауатты, шабуылда ширақ. Шамалары Шотландияның «Селтигіне» жетеқабыл. Литваның «Жальгирисінен» мықты. Бізге бар мәселені Беларусьтегі матчқа қалдырмай, ертең шешіп алу қажет.
Естеріңізге сала кетейік, "Астана" – БАТЭ ойыны ертең "Астана-Арена" стадионында сағат 20:00-де басталады.