Әуелі айта кетейік, 16 тамыз күні Глазгода шотландиялықтарға қарсы бірінші ойынын өткізіп қайтатын «Астана» жауапты матчты 22 тамыз күні «Астана-Аренада» қабылдайды. Ойын сағат 21:30-да басталады.

Чемпиондар лигасының үшінші іріктеу кезеңінің аясында өткен «Астана» – «Легия» (Польша) кездесуінің билеттері 500 бен 2500 теңгенің арасында болатын. Клуб әкімшілігі плей-офф кезеңіне билет бағасын екі есе қымбаттатыпты. Яғни, аталмыш кездесудің билет бағасы 1 000 теңге мен 5 000 теңге аралығын құрайды. Дегенмен, болмашы концерттердің кіру құны 10 000 теңгеден басталып жатқан да Чемпиондар лигасының плей-офф кезеңі үшін 5 000 теңге дегенің әсте қымбат емес.

Билеттер 6 санатқа бөлінген. 1-ші санат – 1000 тг, 2-ші санат – 1 500 тг, 3-ші санат – 2 000 тг, 4-ші санат – 2 500 тг, 5-ші санат – 3 000 тг және көпшілік арасында VIP сектор ретінде танымал 6-шы санаттың билеттері 5 000 теңгеден.

Ойын билеттері алдағы күндері Ticketon.kz сайты арқылы онлайн жүйеде сатылымға шығарылады. Стадион кассаларының жұмыс уақыты туралы ақпарат қосымша кейінірек хабарланады.

Студенттер мен мектеп оқушыларына 50% жеңілдік қарастырылған. Зейнет жасындағы адамдарға (зейнеткер екендігін дәлелдейтін құжаттарын көрсеткен жағдайда) ойынға кіру тегін. Зейнеткерлерге ыңғайлы болу үшін W1 секторы арнайы бөлінген.