Бұл кездесуге Қостанай облысы әкімі Архимед Мұхамбетов пен қала әкімі Базыл Жақыпов қатысыпты. Облыс әкімі биыл команда құрамының әлеуеті зор ойыншыларымен жасақталғандығын, команда сапындағы 23 футболшының шамамен 16-сы әлі 27-ге толмағандығына айрықша көңіл аударған.

Ал клуб басшыларымен, бапкерлерімен және футболшылармен өткен кездесуде жанкүйерлер өзекті сұрақтар қойып, команданың жағдайына алаңдайтындықтарын білдірген. Тіпті Нұрбол Жұмасқалиев мәселесі тағы да “көселген”:

Сұрақ:

– Жұмасқалиевтің 9-шы нөмірін Темирлан Эльмурзаевқа бергендеріңізді қалай түсінуге болады? Нұрболдың орны бөлек, сондықтан оның жейдесін мұрайда сақтасақ та болмайтын ба еді? 

«Тобыл» клубының бас бапкері, Омари Тетрадзе:

– Нұрболды құрметтеймін. Бірақ біз кәсіпқой командамыз. Оны ешкім де қуған жоқ. Біз оған жұмыс ұсындық, ол одан бас тартты. 

«Тобыл» клубының директоры, Талғат Баймұратов:

– Егер ол біздің клубтың жүйесінде жұмыс жасағысы келсе, Нұрболға клубтың есігі қашан да – ашық. 

9-шы нөмірді алған футболшы, Темирлан Эльмурзаев:

– Мен біздің клубтың аңыз ойыншысына айналған футболшының нөмірін алдым. Шынымен де, мені қандай да бір қысымнан қорқады деп ойлайсыздар ма? – деп жауап берген «командада бес шабуылшы бар, өзіңізді көрсетуге дайынсыз ба, бәсекелестіктен қорықпайсыз ба» деген сұраққа.