Әйелдер арасындағы УЕФА Чемпиондар лигасының 1/16-финалында «БИІК-Қазығұрт» Шотландияның «Глазго-Сити» клубымен кездескен болатын. Шымкентте өткен бірінші ойында Қазақстан чемпионы 3:0 есебімен жеңіске жеткен-ді.
Алайда Глазгоның «Питерсхилл-Парк» стадионында өткен қарымта матчта қыздарымыз әбігерге түсті. Түзде 1:4 есебімен ұтылып қалып, Чемпиондар лигасы додасынан шығып қала жаздады. Жарты сағаттай жандары мұрындарының ұшына келіп, жағдайлары қыл үстінде тұрды...
Негізі, «БИІК-Қазығұрт» бұл ойынды тәп-тәуір бастаған. Тіпті, ойынның басында, дәлірек айтқанда, 19-минутта есеп ашып, «Глазго-Сити» қыздарын сең соққандай күйге түсірді. Өйткені, олардың жағдайы мүлде қиындады. Енді оларға бес гол соғу керек...
Бірақ Шотландия қыздары қайсарлық танытты. Бірінші таймның аяғында есепті теңестірді. Мұнымен шектелмей, екінші тайм басталған бетте (12 минутта) үш гол соқты. Сонда бас-аяғы 20 минуттың ішінде төрт гол соғып, жанкештіліктің үлгісін көрсетті. Біздің қорғаушыларымыз да, қақпашымыз да қапы қалып, жаза басты...
Ойынның аяқталуына әлі жарты сағаттай уақыт бар болатын. «БИІК-Қазығұрт» қыздары әбден сасқалақтап, жиі қателесе бастады. Ойындары жүрмей қойды. Ал төрт гол соққан алаң иелері жігерленіп, шабуылды үдетті. Айылдарын жияр емес. Тек алға қарай ентелейді.
Бірақ 20 минут бойы бар күш-жігерлерін салғандықтан ба, шаршап та қалған секілді. Біздің қыздар допты тек өз қақпамыздан алысырақ теуіп жіберумен болды. «Қайда, кімге?» оған қарайтын уақыт жоқ. Алаң иелерін тек қақпаға жақындатпаса болды...
Қазақстан чемпионының бас бапкері, болгар маманы Калоян Петков алаңға тың ойыншылары шығарып, тым болмаса осы есепті ұстап қалуды ойлап, қам-қарекет жасап жатыр. Тіпті шабуылшы Гүлнара Габелияны да ауыстырып тастады. Қорғанысты күшейтпесе болмайды.
Сөйтіп жүргенде, біздің қорғаушылар ойын ережесін бұзып, матч соңында төреші біздің қақпаға пенальти берді. «Глазго-Сити» капитаны Линн Росс 11-метрлік нүктеден шірене тепкен. Қақпашымыз бір бұрышқа секіріп, доп екінші бұрышқа ұшты... Абырой болғанда, зулай ұшқан теңбіл доп қақпа бағанасына тиіп, кері қайтты.
Шотландия клубы бұдан кейін де, шабуылды үдетті. Қақпашымыз уақыт созбақ болып, «жарақаттанып» қалғандай болып еді. Бір қызығы, төреші допты ойынға тура сол жерден қосып (ортаға тастап), екі команданың қыздары қақпа алдында ұмар-жұмар болды. Әрі «Глазго-Сити» қыздары ырза болмай, үш рет қайталады. Олар үшеуінде де біздің қақпаны нысанаға ала алмады.
Ойынның негізгі уақытына үш минут қосылып, тағы да біраз қобалжуға тура келді. Әйтеуір матч осылай аяқталып, «БИІК-Қазығұрт» Чемпиондар лигасының 1/8-финалына шықты. Жалпы есеп 4:4 болғанымен, Қазақстан чемпионы түзде соққан бір голының арқасында келесі кезеңге өтті.
«Глазго Сити» – «БИІК-Қазығұрт» – 4:1 (1:1)
Голдар: Ихезуо, 19 (0:1). Грант, 43 (1:1). Грант, 51 (2:1). Мюррей, 59 (3:1). Грант, 63 (4:1).
Пенальти соға алмады: Росс, 83 (қақпа бағанасы).
Ескертулер: Маккейб, 36. Максорли, 90+3 – Габелия, 52. Бабшук, 90.
«Глазго Сити»: Ли Александер, Никола Дохерти, Лорен Макмерчи, Линн Росс, Саванна Маккарти, Леанн Кричтон (Джоан Пэтон, 87), Джоан Лав (Эйлиш Максорли, 84), Хэйли Лаудер, Эбби Грант, Ноэль Мюррей, Кэти Маккейб.
Қосалқы құрам: Эрин Клэчерс, Карла Бойс, Кива Кинэн, Саманта Керр, Меган Фоли.
«БИІК-Қазығұрт»: Александра Гребенюк, Юлия Мясникова, Брук Даннигэн, Кристина Машкова, Дарья Кравец, Бегайым Қырғызбаева, Келин Корт, Екатерина Бабшук (Жозефин Нганди, 90), Черити Адуле (Юлия Николаенко, 66), Чинвенду Ихезуо, Гүлнара Габелия (Светлана Бортникова, 90+3).
Қосалқы құрам: Оксана Железняк, Ұлбосын Жолшиева, Алина Литвиненко, Екатерина Красюкова.
Төрешілер: Уэрта де Аса, Поррас Аюсо, Пуэнте Пино (бәрі де – Испания).
12 қазан. Глазго. «Питерсхилл-Парк».
Ойынның қысқаша статистикасы:
Соққы: 25 – 5
Тура соққы: 6 – 3
Қиыс кеткені: 15 – 2
Тойтарылғаны: 4 – 0
Бұрыштама соққылар: 4 – 0
Офсайдтар: 5 – 3
Ескерту (сары қағаз): 2 – 2
Ереже бұзу: 11 – 13