«Астана» – Срджан Граховац (Босния және Герцеговина)
«Астана» Венаның «Рапид» клубымен ымыраға келіп, Босния және Герцеговина құрамасының 24 жастағы ойыншысы Срджан Граховацты алатын болыпты. Әзірше жалға алған. Бірақ екеуара келісім бойынша 2018 жылы жас футболшыны сатып алады екен.
Енді Срджан Граховац Астанаға келіп, медициналық тексерістен өтеді. Ол 1992 жылы 19 қыркүйекте туған. Жартылай қорғаушы, қорғанысқа тірек болар шепте ойнайды. Бойы – 183 см, салмағы – 76 келі.
Австрия чемпионатының 2016/17 жылдар маусымында 21 ойын өткізіп, екі гол соғыпты. Сонымен қатар, Еуропа лигасы додасында тоғыз ойын өткізген. Жалпы, «Рапид» сапында 2014 жылдан бері өнер көрсетеді. Өз елінің ұлттық құрамасы сапында алты рет жасыл алаңға шықан.
«Қайрат» – Чума Анене (Норвегия)
«Қайрат» Норвегия шабуылшысы Чума Аненемен 2+1 жүйесі бойынша келісмшартқа отырыпты. Тамырында Нигерия қаны соққан бұл ойыншы Алматыға Ресейдің «Амкар» клубынан ауысып келді. Көрші елде 2015 жылдың қыркүйек айынан бері ойнады.
1993 жылы 14 мамырда туған. Шабуылшы. Бойы – 189 см, салмағы – 90 келі. Норвегияның жасөспірімдер арасындағы құрамаларында ойнаған. «Қайраттың» басшылары мен бапкерлері оның Ресейде біраз уақыт ойнағандығына мән беріп, Қазақстан чемпионатына тез бейімделіп кетеді деп үміттенеді...
«Ордабасы» – Преслав Йорданов (Болгария)
«Ордабасы» клубы ақыры құрамына болгар шабуылшысы Преслав Йордановты тіркеп тынды. Бұлай дейтін себебіміз, аталған футболшы оңтүстікқазақстандықтар құрамына бірден қосыла алмады. Болгария басылымдары таратқан ақпараттарға сенсек, тренсферлік төлемақысы дер кезінде аударылмаған.
Бұл мәселе енді шешімін тапқан секілді. «Ордабасы» клубы Преслав Йордановтың команда сапына қосылғанын ресми түрде жариялады. Тіпті «18 наурыз күні Ақтөбедегі ойында алаңға шығуы тиіс» деп жазды. Қазір ол Шымкент клубы сапында жаттығып жүрген көрінеді.
Преслав Йорданов 1989 жылы 21 шілдеде туған. Бойы – 190 см, салмағы – 80 келіге жуық. Болгарияның жастар құрамасында екі матч, ал ұлттық құрамасы сапында бір ойын өткізген. Шымкентке ЦСКА (София) клубынан келді.