Әне-міне дегенше, Премьер-лиганың алғашқы айналымы да аяқталып, мамырдың бірінші ширегі де артта қалып барады. Бірақ, жасыл алаң мәселесі әлі де өзектілігін жоғалтқан жоқ. Өз алаңындағы ойындарын қосалқы алаңдарында өткізіп жүрген командалар әлі де баршылық. Ал еурокубок ойындары жақындап қалды. Енді бір айдан кейін «Астана» Чемпиондар лигасында, ал «Қайрат», «Ертіс» және «Ордабасы» Еуропа лигасының іріктеу кезеңіне қатысады.
Жарайды, елордалықтар мен алматылықтардың ахуалы белгілі. Олардың ареналары халықаралық ірі матчтарды қабылдай алады. Стадиондары УЕФА талаптарына сай. Дегенмен, Павлодар мен Шымкент стадиондары ше? Иә, олардың да стадиондарында іріктеу кезеңдерінің ойындарын өткізуге болады. Ары қарай топтық кезеңге өтуге «Ертіс» пен «Ордабасының» шамалары да жете қоймас.
Жалпы, елімізде сиымдылығы 10 мың адамнан асатын 11 стадион бар екен. Оның жетеуінде Премьер-лига ойындары өтеді. Қалған төртеуінде Бірінші лига командалары доп теуіп жүр. Яғни, «Атырау», «Ақжайық», «Тобыл», «Қайсар» және «Оқжетпес» қонақтарын сиымдылығы 10 мың адамға жетпейтін стадиондарда қабылдап жүр. Атыраудағы «Мұнайшыға» 8 900, Оралдағы Петр Алоян атындағы стадионға 8 320, Қызылордадағы Ғани Мұратбаев атындағы стадионға 7 000, ал Көкшетаудағы «Оқжетпеске» бар болғаны 4158 көрермен сияды.
Бірақ, бұл маңызды емес. Аталмыш стадиондарда жанкүйерлердің лық толып отырғандары шамалы. Оны айтасыз, Премьер-лига командаларының жартысына жуығы әлі өзінің негізгі алаңына көше қойған жоқ. Ал «Ордабасы» мен «Қайсардың» негізгі ареналары Премьер-лига ойындарына жарамсыз деп табылып, қосалқы алаңдарға көшірілді.
Қосалқы алаң демекші, Қызылордада Ғани Мұратбаев атындағы Орталық стадионның қосалқы алаңы ұзақ күттіріп, ақыры күрделі жөндеуден өтті. Кәсіпқой футбол лигасының арнайы комиссиясы алаңның сапасын тексеріп, мақтап кетіпті. Оны өздерінің ресми сайттарында жазды да. Алайда, арена бар болғаны 1 300 көрерменге арналған.
Осы орайда айта кетейік, «Қайсар» – «Астана» кездесуін тамашалауға 5 000 адам жиналды. Ол ойынды Стойчо Младенов шәкірттері негізгі стадионда өткізген. Бірақ, «Ғани Мұратбаев» пен «Локомотив» стадиондарының алаңдары жарамсыз деп табылғаннан кейін «Ақтөбені» қосалқы алаңда қабылдаған. Бас төрешінің хаттамасына сүйенсек, ойынды тамашалауға 2000 көрермен келген екен.
Дегенмен, жанкүйерлердің саны екі есе көп болуы да мүмкін. Өйткені, алаң жиегінде командасына тік тұрып жанкүйер болғандар да жетерлік. Соған байланысты қазір ол жақта қосымша трибуналар қосуға қаржы бөлінген екен. Ал бізге жеткен ақпараттарға сенсек, Орталық стадионның алаңын жақсартуға 150 миллион теңге қарастырылыпты. Тамыз айында толық аяқталып, сапасы жөнінен Алматының Орталық алаңынан еш кем болмайтын көрінеді.
Осылайша басты сұрағымыздың жауабы өздігінен табылған сияқты. Қазақстан Премьер-лигасының ойындарын әр қалада тұрақты түрде 3-5 мың көрермен тамашалап тұрады. Еурокубок ойындары дейсіз бе? «Астана» мен «Қайрат» болмаса, алдағы он жылда басқа клубтарымыз Чемпиондар немесе Еуропа лигасының топтық кезеңіне асықпайтын сияқты. Ал іріктеу кезеңдерін қазіргі алаңдарында-ақ қабылдай беруге болады.
Ендеше әр өңірден орасан қаржыны талап етпейтін 7 мыңдық шағын стадиондар салып тастауға не кедергі? Айтпақшы, орайы келгенде айта кетейік, аса көзімізге іле бермейтін көршілеріміз Түркменстанда 5 мыңдық шағын ареналарды айтпағанда, 2009 жылдан бері 10 мың көрерменнен асатын су жаңа бес стадион салып тастапты. Үлгі алуымыз керек-ақ...
